За работа со овие апарати, преку едукација во земјава и странство, се оспособени лекарите од интерното одделение. Новите апарати, кои на велешката болница и ги обезбеди Министерството за здравство, многу ќе помогнат за давање здравствена заштита на пациентите од општините Велес, Градско, Чашка, Лозово и Неготино кои се лекуваат во велешката болница. Покрај интерното одделение, со нов современ апарат е опремена и кожната амбуланта. Набавен е дерматоскоп, со кој ќе може да се дијагностицира секоја промена на кожата кај пациентите. Целата опрема чини триесет илјади евра, а покрај новата најсовремена опрема, физикалното одделение на велешката болница е вистинско градилиште. По шест децении се менуваат сите прозорци, врати, подот, водоводната и електричната инсталација. Со овој проект треба комплетно да биде променета фасадата со термофасада со што ќе се придонесе за енергетска ефикасност, како и внатрешно реконструирање на одделенијата на болницата. Потоа ќе следи и реконструкција на Инфективното одделение кое е сместено во засебна зграда во склоп на болницата, а за што проектот е во завршна фаза. По завршување на проектот ќе се почне процедурата за набавка со што ќе се избере изведувач на градежните работи и за ова одделение, појасни министерот Тодоров. Тој воедно информира дека е направена сериозна заштеда на средства во делот на договорот за реконструкцијата на велешката болница. – Беа предвидени 25 милиони денари, а сега е падната инвестицијата на околу 18 милиони денари. Инаку овие средства за реконструкција на Велешката болница се од заштедените средства кои ги направи Министерството за здравство со централните набавки и овозможувањето на конкуренцијата и паралелниот увоз на лекови со што се заштедени вкупно 250 милиони денари. Токму еден дел од тие средства се наменети за реконструкција на велешката болница.